• 白至北
• 2010年06月04日
• 艱險指數
• 念慈指數
• 庵友：流曉勤
• 修行路線
• 

＊白至北，為人們帶來無限歡樂…又到澗季了，是時候到山上弔唁一下這位朋友…說真的，已經唔係好記得三名庵友到底係咪只係為左拼湊出呢個咁既遊記名而連走白北二澗…白芒石澗為大東山系東北方既一支中型石澗，澗谷獨立於三山台北緣，澗道稍長，唯景觀尚佳，最常與北龍或低埔坑串遊。北龍，東涌五龍之老么，著名景觀有天書壁，玻璃水，枯樹，碎石，濕泥等等，一般黎講幾個字已經足夠降畢全澗，常作為群龍既連接衢道，角色十分重要，自金峰五龍迎千禧，馳騁九龍群英會，以至較近期既鷹傑七加二，北龍均成為一眾健兒既跑道。

＊東涌起步，天氣悶熱之餘更帶點暗暗既陽光，十分不討好，令人只想快d入澗。放棄山路，沿海旁輔道直奔白芒澗口。

＊收拾行裝後便跳落澗，三名庵友可能因為太耐無行澗修行既緣故，竟然對跣腳，食蜘蛛網等鎖事產生一種莫名既恐懼感，令士氣一度低落，前進速度不斷下滑…

＊續上，澗道漸見開揚，水很清，不消片刻就黎到大休勝地龍涎潭。

＊水，還是一樣的清，一樣的綠，一樣的冷，一樣的美…

＊泳水之慾不大，還是在其表面欣賞一下好了，獵影模式，投壺模式，棒球模式，各適其適。

＊龍涎潭，樹蔭下既淺水區尤其討好…

＊要翻越胡同狀既龍涎潭，除左兜右邊山路安全模式之外，亦可沿潭邊水管進入潭後既瀑峽上攀，而由於水管與潭邊直壁距離頗遠，一下唔小心踏個空既話唯有跳潭逃生。上攀瀑峽方法有二，一是冒水沿瀑正攀，水沛時不適用，二是攝上右壁繞過。

＊攀，浮誇得很…

＊小清潭一口。

＊峽潭斜瀑。

＊一連串開揚潭瀑後便是此澗另一被冠名既景點龍簾瀑，胡同小峽亂石成瀑，聞說瀑後石室可容數人，但一探既興趣不大。從右繞上，遇一小石台，小石堆已變成愛心造型。

＊水，還不如德勤般清純…

＊林蔭澗道。

＊清…

＊未幾，澗道忽然變得狹小如x，四周盡是亂石枯樹，呈現一副被夾雜少量山泥既洪水沖刷過後既澗貌，有幾個位更要使用行軍模式通過，與零八年前萬分迴異。荒坑盡處便是一段開揚既landslide澗道，澗水消失率達一百巴仙。

＊沿landslide澗道上溯小段，黎到呢個消失了的分源位置，左方重新登入主澗，進入上游既林蔭翠瀑段。

＊分源位以上澗道坡度倍增，帶黎一連串綿長既流瀑，亦帶黎無窮無盡既攀爬。由於澗道全程歸隱於原始森林之中，澗畔既苔蘚類植物覆蓋率極高，好多時候瀑面正攀反而更安全。雖然澗道不見天日，但尚算寬廣清幽，景觀有別於密林狹坑之流。

＊高瀑一道，德勤以浮誇既技巧上攀，結果，下一秒佢以更浮誇既既姿態slide返落瀑底，正式崩潰…

＊攀呀攀呀攀，導致德勤持續呈崩潰狀…

＊澗尾既絕峽，清幽得像園林瀑景。

＊小休一會，待德勤進入瀑中固本培元一會後，自瀑右上攀，再上溯一小段，澗道開始變成無澗道，至一小型天書壁狀物後右接山路離澗。

＊崩潰了…沿小徑穿越三山台以北既高原地帶。

＊接返大路之後，翻過山坳直出小指峰（另有一說指小指峰為薄刀屻西南麓之牛牯僕），峰北有指型突岩一塊，峰南為北龍源末既絕壑。

＊小心翼翼攝落天書壁，十分有趣既一個攀爬位置，月巴者易被卡在壁中動彈不得。天書壁，不多作介紹了，大水既時候會出現天書瀑。北龍中游以上為著名既風化澗道，溫馨提示一下：天書底部風化頗為嚴重，有如髮線一樣隨住時光飛逝慢慢上移，常有岩塊從書底剝落，危險勿近；另外，沿澗下降既時候亦要留意一下兩旁既岩壁是否有隨時崩塌之勢。

＊陰濕非常既北龍上源。澗邊既一道濕壁，算係北龍最騎呢既攀爬位，尤其係被迫一手摸落塊壁上面堆濕泥度既時候，感覺實在很x。小瀑，德勤自動調校至自願滑梯模式。

＊死了都要slide…=_=一臉崩潰既樣子…

＊北龍中上游既一段澗道被流水沖刷成深陷既坑槽狀，自澗邊暗棧下降，得小心一下那無限既枯木碎石。

＊北龍素以玻璃水聞名，流水被石塊不斷過濾，清得沒帶半顆沙，坑峽澗道以下始現一個個玻璃瑤池。

＊全澗唯一既開揚位置，有潭瀑數疊，庵友們無視黑夜既降臨，小休一會洗擦一下泥塵，洗滌一下心靈。由於瑤池之水乃至寒之物，欲沐浴其中，必須學習德勤長老ARRR一下，方能一鎮寒氣…

＊夜至一更，黑齊了，只好以數位相機既閃光燈作照明工具，繼續夜降北龍。幸好北龍下游皆為無甚難度既林蔭平流，加上住持擁有相當既北龍經驗值，眾庵友皆十分放心，但正因為過度放心，竟然一下唔小心miss左澗口附近既乾坑，直指集水區…唔…黑夜剷林同黑夜泳渡都絕對唔係好既選擇，唯有回頭以閃光燈尋找一下那遺失了既乾坑出路，閃到眼睛脫落，最後還是找到了。

＊返回水壩，重臨月巴不愉快地，沿黃龍坑道出東涌夜宵模式，了結白至北…