• 附鳳攀龍
• 2009年05月29日
• 艱險指數
• 念慈指數
• 庵友：流曉勤
• 修行路線
• 

＊飛龍飛鳳…收山前最後一次活動，一如所料，陣容果然鼎盛，再次出現天鳥組合…雨季前夕既錨mu天氣實在令人卻步，短線閒遊成為唯一選擇。飛龍飛鳳早於幾十年前經已聲名大噪，雖然澗道只屬中小型，但開揚巨壁異常密集，夏雨後每每化身成癲鳳狂龍（二澗之別名），甚具氣勢；至於其他時候，飛蟲飛蛹而已…

＊首先送比大家既係幾張bonus track，攝於零五年八月。當然，今日既只係蟲蛹…

＊長途跋涉，鐵路，巴士，引水道，油塘老地方集合後逾一個時辰先黎到飛鳳既入澗位…甫入澗，走過幾分鐘既垃圾坑道，便到達巨壁底部，缺水，但溜冰指數很高，安全模式登入澗邊山路…

＊山路接入巨壁中段，下臨無地，抬首一望盡是級級岩崖，小心翼翼沿壁左前進，坡度甚高，但險而不難。

＊壁頂緊承一小段緩衝澗道，數分鐘後到達巨壁二段，只見瀑壁比第一段更為畢直，但層次則較為分明，眾庵友見狀紛紛以浮誇既姿態中路突破，睇下，德勤果真浮誇得很…

＊攀。

＊巨壁頂端，一試之下發現岩石過份濕潤，只好以安全模式翻上壁頂。

＊壁頂小休睇下風景，之後進入零景觀地帶，澗道十分狹小，只想快d逃走…

＊至一峽潭附近澗邊山路漸見明顯，加上呢個時候大家都有好強既離澗慾，行行下不知不覺比路胚引左上澗左既小山丘，到發現既時侯已經失去左回頭既意慾，唯有安慰一下自己，以方向同距離黎計呢條都算係一條捷徑黎…

＊沿脊向雞公山巔大方向前進，漸漸進入路•無路•無路既境界，植物過份健康，而且高度與人相若，一片惡林既格局。上山途中，景觀漸見開揚，但前面仍只有遙遠的林，飛龍澗道則於另一邊腳下，忽然有直線剷林落澗模式既衝動…幸好最後還是按捺住了，乖乖地繼續向上剷，崩潰左個幾鐘後終於出返麥徑，張曉長老個頭亦無啦啦崩潰了，真係來一嚇…

＊沿麥徑行前兩步轉落飛龍既澗源位置，一路沿陡斜既澗位下降，見證一條石澗既誕生，澗道由茂密既無澗道漸漸變成有澗道，落左半條澗之後開始有返d景觀。落呀落呀落，未幾，澗道開揚了，黎到壁頂了，又到酉時了，我們小休了…

＊小休過後開始下降飛龍精華段。

＊沿瀑拾級而下。

＊黎到一幅廣闊直壁既頂部，腳下便是飛龍主瀑。主瀑正壁可攀，但似有三萬尺高，而且噢花畢直，正路應由瀑邊石峽攝落去，比較安全。

＊飛龍主瀑，甚具氣勢，大水時應為名瀑之列，瀑右有棕櫚科植物一棵，很mismatch…

＊主瀑以下澗道更為闊大，一瀑接一瀑，頗有大澗風貌。

＊又一高瀑，兩位長老既甫士可以進步一下嗎…

＊斜瀑，正攀既話100%溜冰墮潭…

＊一小段林蔭澗道後，黎到飛龍澗口之上既第一道瀑布，十分高大。

＊瀑底前方不遠處便是水壩，翻上水壩後出引水道完成附鳳攀龍之途，黑夜將至，快步返回水浪窩搭公車出沙田d模式。