念慈遊記 / 慈騁百澗 / 屏南

屏南
2008年07月12日
艱險指數
念慈指數
庵友：流曉勤，張嘉文
修行路線

＊黃嶺山系，俗稱大八仙，南陡北緩，係一座典型既沉積岩單斜山，水源豐富既北麓孕育出各具特式既屏南（古稱老龍坑）橫涌兩道河川，長踞本港石澗榜前列。由於眾庵友從來未去過附近修行，加上嘉文對於修行既熱誠實在令人感動，因此三隻天鳥完全無視潛在既惡劣天氣，捨命陪凱子，遠征大東北。

＊由東區老家北上粉嶺，再搭56K入南涌，堪稱念慈史上最長途既塵奉凌，如果轉用光纖效果會好好多…=_=昂貴既車程，加上長途既車資，令嘉文未出發先興奮，熱誠被冷卻成冷誠，一度想跳車逃生…時間關係，放棄嘉龍潭，南涌有落，沿馬路直入老龍坑既深谷。

＊水壩入澗，以行街裝備首次上陣既嘉文表現十分不俗，無懼雨後濕滑既公路同埋粗心大意既司機，迅速拋離眾人。

＊小堤壩後正式進入屏南精華段。順帶一提，雖然今日屏南既水量明顯比夏天既平均值大，但係已經比住持既平均值細好多。唔，應該係鶴咀咒以外既另一詛咒…

＊精華段首個被冠名既景點，魚潭與魚瀑（註：呢個名並唔係享哥哥既產物，可以放心使用）。

＊小休一會浸下丹寧酸後繼續上路，上攀魚瀑，回望魚潭。瀑頂為一段小平流，向前面澗道望去，只見高瀑紛陳，宏偉壯觀，甚具大澗風貌。

＊怪潭與怪瀑，陰濕非常，一個巨大壺穴既格局，名字既來源可以參考一下祁公既名著。怪潭壺穴既右上方有一個比一眾後生仔玩命既懸空跳台，堪稱山澗意外黑點，早登極樂既佳選…

＊怪瀑頂就係屏南既地標草裙瀑，由一幅廣闊水簾構成既五十尺巨瀑。論氣勢，佢可能唔及其他名瀑；但論優雅，境內真係無瀑能及…

＊比較一番：左圖係今日既草裙，瀑頂有德勤；右圖係布料比較厚既草裙，瀑頂有眾人…

＊右邊山路上頂，回影瀑底清簾潭畔既兩名裙下之臣…

＊草裙瀑頂緊接既唔係一條纖腰，而係老龍潭，成條老龍坑最著名既潭，壺穴既後方埋藏左一道分層而下既絕瀑，形成左一個插翅難飛既格局。

＊要越過老龍潭以上既絕峽，須取道澗右山路，直登南涌郊遊徑，或經壁底既一道小棧，跨越一線湍流重返澗道，大水既時候通常要食得夠尖一躍而過。

＊回望一線湍流。壺穴。

＊下游既最後一瀑，從容從瀑右攀上，瀑頂係一個大淺潭，南涌郊遊徑於潭頂跨過。

＊係咪大休喇？係呀…=_=

＊大休玩水，無陽光真係凍到變冰條俠…另外，眾庵友發現念慈庵貧富懸殊既情況愈黎愈嚴重，有人嘆豐富既吉野家外賣，有人要瑟縮一二角靠麵包充飢…

＊休夠繼續上溯，進入屏南二段，路過一處小塌方後，澗道豁然開朗，可以跑澗跑到去跑安拉…

＊經過全澗最寬闊既一段之後，澗道再次變得陰濕，面前雙瀑而立，表示庵友們已經黎到屏南中游既代表性景點，雙瀑。

＊境內各大名瀑既名，要成功將佢閱讀好多時都要有返d想像力或者語文知識，例如藏幽瀑我地要想像下佢究竟點樣藏幽法，千層瀑我地要知道佢用左誇張既修辭技巧…而雙瀑呢個名，真係最簡單直接，方便易明，呢d就係好名…雖然境內可以用雙瀑黎形容既石澗景點不計其數，但雙瀑呢個冠名權唯獨屏南所擁有，d咩九曲雙瀑，銀絮雙瀑都只好行埋一邊。