• 雙潭崗柴大
• 2008年07月09日
• 艱險指數
• 念慈指數
• 庵友：流曉勤
• 修行路線
• 

＊落左好幾日雨，念慈庵飛行組合再次出動。由於天氣唔係太穩定，為免累積飛行里數，經商議後決定黎一個安安全全既半日閒潭夏季終極進化版，路線延長左，個身濕左，念慈指數推高左…

＊塘口起步，塘尾經中塘壩底入溯雙潭。

＊繼05年崗碧自擁同06年碧水舞雙潭之後，再一次遇上呢個級數既水量。甫入澗，得到馬騮同學既愛心天氣提示，驟雨便至。

＊三人一於少理，任由雨點橫飛；水中橫行無忌，別有一番風味；德勤數位相機，驟雨後已昏死…=_=

＊發現湍蛙一隻…=_=

＊穿過中游既短小曲流帶，進入精華段。

＊雙潭三大瀑布之下瀑，碧水潭瀑布，大水之下只見瀑水如一道白鍊直墜碧水潭，一氣呵成。

＊中瀑碧水灘，寬廣既澗床構成左境內數一數二既雄偉澗貌，氣勢足可與嶼西水澇漕，西域青大四疊等名澗匹敵。

＊發現彈塗魚兩條…=_=

＊上攀碧水灘。

＊碧水灘頂回望，景色親像外國既名山大川。碧水灘頂既直角缺口，蘊藏既引力勢能十分巨大而集中，正以動能既形式一下子釋放出黎，唔小心跌落去既話應該會沖到四肢脫落…

＊雙潭三大瀑布之上瀑，半葉潭瀑布，之字形既急流極為洶湧，捲起千堆雪，瀑中絕無立足之地…

＊沿瀑左翻上瀑頂，過澗右上燒烤場離澗，湍蛙再現，差d沿澗沖返落碧水灘…=_=

＊下降男路接下路，鏡頭一轉已經黎到潭崗石澗，沿澗下降至瀑頂淺潭小休風呂一下。

＊點遊潭崗飛瀑。差到錨mu既造型照…=_=

＊瀑底既小沙灘。

＊如果大家係念慈庵既粉絲，一路有追開庵遊記既話，你會發現其實雙潭崗呢條路線大大話話已經出現過n次，連住持都寫到厭…為左比d新鮮感大家，三位庵友決定繼續今日既修行…下一站柴大，一條久違了既港島名澗。

＊沿港島徑東行至金鰂塘，轉走柴大水管路，基本上條路同條澗係平衡既，可以求其搵個位跳落澗。

＊一入澗就係一連串既峽潭短瀑，從旁越過難度唔大。

＊柴大石澗澗容寬闊，林蔭蔽日，甚巨原始風味，加上源末引水道地龍帶黎既額外水量以及無限既固體廢物，實在頗具特色，難怪會得到行山界前輩們既青睞，成為連接港島南北既著名『渠道』。

＊繼續上溯，澗道開始慢慢攀升。呢個時候，澗道突然收窄，黎到一個三疊峽瀑既位置，只見洶湧既瀑水沿垂直既坑槽翻滾而下，仿佛前無去路。呢個峽瀑亦係全澗既難度所在，艱險指數三粒星既來源。先沿瀑右既一線暗棧翻上第一層瀑頂，只要小心壁間既碎石便可。

＊峽瀑既第二層較為垂直，而且峽壁呈內穹形，完全無攀爬既機會，唯有從右邊疏林繞至瀑頂再跳返落澗。

＊黎到第二同第三層峽瀑之澗既緩衝區，舉頭一望，面前呢個瀑既造型好奇怪，瀑中間卡住左一塊好大塊既水泥板，為本來無法攀越既峽瀑帶黎一線生機。先沿水泥板攀上瀑布既一半位置，然後駛出絕學『後移法』跨越洪流至瀑右濕身攀爬而上。

＊成功翻越精彩既峽瀑群，柴大既澗途已經接近尾聲，眼前既就係地龍口以下既飛瀑，一個死胡同既格局，三面環壁，引水道既豐沛流水直墜瀑下既碗形深潭，十分澎湃。

＊循瀑右山路上攀，進入地龍，向柴灣方向推進。

＊隧道近柴灣入口發生嚴重交通意外，幾十枝樹枝連環相撞，柴大隧道既所有行車線現已封閉，駕車人士請改用牆邊既水管，多謝合作…出地龍之後沿水管路經峰華邨落山t模式，4點都未夠，真閒遊。