• 圓墩飛瀑
• 2006年08月05日
• 艱險指數
• 念慈指數
• 庵友：痴花
• 修行路線
• 

＊圓墩四澗分別以東，南，西，北四個方位命名，論名氣，當然以又名蛇舌坑既圓墩東坑為首，但論到景色方面，圓墩北坑絕對係四澗之首。

＊大欖涌會合阿花，馬路直入懲教所，簽個名之後穿過懲教所上水塘。遠在涌口已經聽到大壩洪水既嘯聲，埋到去只係見到一片全白，層次感完全被淹沒。

＊如此水勢，相信無乜邊條壩可以匹敵，大潭篤都要行埋一邊…

＊沿住塘邊馬路向塘尾方向行。由於今朝落過一場大雨，路邊既荒坑出現唔少飛瀑。

＊好快就去到圓墩北坑澗谷，諗住由地龍口入澗，行入去一睇，發現由深井水塘湧過黎既水已經達到左洪水級數，如果強行橫過既話只會被沖走，宣佈入澗失敗…其實地龍口以下一段都幾有睇頭，臨到水塘更加有一個闊大既落差位，可惜今日咁既環境被迫放棄…

＊改變一下計劃，由馬路橋位落主源再上左源，避開地龍口一段。馬路邊係一幅大石坡，下接一個巨大落差位，就係圓墩飛瀑既所在。

＊山路直落瀑底，十分方便，但由於名氣不足，所以黎觀瀑探遊既人始終唔多。

＊圓墩飛瀑。

＊瀑高約十米，流水分兩道而下，左邊一道輕垂如絲，右邊一道澎湃奔騰，瀑水直撞對面既崖壁，激起無盡水花。瀑底既深潭呈三角形，後面有一個水簾洞之類既物體，可以游入去欣賞下飛瀑水簾既景緻。

＊面對住咁出色既潭瀑，跳潭，攀瀑呢d環節當然唔少得。

＊玩左個幾鐘終於捨得起行，沿澗下降，會遇到另一個落差位，再落多少少就到分源位。

＊轉上左源，進入未知既世界。圓墩北坑本身已經少人玩，左源既瀏覽量相信非常接近零…驚喜終於出現，眼前出現一個頗有氣勢既絕峽，仲隱約見到峽尾有一幅頗高既飛瀑。但要入去瀑底並唔容易，無論泳渡攀瀑，定係剷林橫移，都有一定既難度。左源既呢幅飛瀑一d都唔遜色，由瀑底向上望，會見到馬尾狀既瀑花撲面而下，瀑態唔錯。

＊要攀上飛瀑，似乎只有左面既直壁比較可行。一試之下發現唔難但頗險，要小心應付，只要唔好向下望就可以…

＊瀑頂仲有幾級短瀑，好快就可以上返馬路，完成左源。沿圓墩郊遊徑東行，穿過圓墩，去到另一邊既蛇舌坑。

＊今日既蛇舌坑真係差到離譜，d水濁得黎仲好臭，真係唔想掂到d水…行落少少會遇到呢個峽瀑位，應該有山路兜，但懶得滯費事搵，跟瀑邊既絲帶爬落去，爬到一半發現極難，手腳位奇差，全部都係d又濕又跣既腳趾位，一失手跌落下面個垃圾潭應該會引起嚴重皮膚病…=_=好彩最後都安然無恙。

＊撇除水質問題，蛇舌坑既澗貌其實都算唔錯，峽瀑一級接一級，接近水塘一段更有一連串精彩既潭瀑。

＊澗口以下既高瀑。完成蛇舌坑，深井水塘經管理站出深井t模式。