念慈遊記 / 慈騁群山 / 劍脊廢村石林

＊修行，有時候好似阿拉丁神燈，又或者一隻健達出奇蛋，可以滿足你三個願望。而今日既願望，並唔係咩劍脊廢村石林云云，而係t，t，t…而願望既背後，係劉領隊既哲學：『行山無t食，真係好淒涼架！』…

＊劉領隊庵活動二，為表尊敬，兩位長老決定繼續表演大幅度遲到，做功課做得太夜喇你兩條茂late…=_=還好，日上三竿前飛奔至梅子林，踏上喧鬧既城市背後既那片青蔥既田野背後既那群格格不入既新發展項目背後既那座風水極佳既wc背後既那條斜到不行既登山大路。

＊越過小竹林小冧泥小石河等重重易關，遇上倒崖一列，先向右碧血染橫移，然後上攀石峽如攀石俠。

＊撥開矮竹，登上劍脊既末稍，景觀忽然由三百六十度無景變成一百八十度開揚山景。腳下茅坪坑谷既對岸有馬鞍鹿巢，奇峰與石林形成對角構圖。

＊北脊既尾峰，石芽山既標誌山峰，真的很尖，尖過尖尾峰…

＊登石芽，渡刀刃，降草海，越旅人，流曉勤，眺山群…

＊一歲一枯榮，又點夠你型…=_=

＊鳳凰山沒有鳳凰，獅子山沒有獅子，大東山沒有大東，金山沒有金，而今日既水牛山，同樣沒有半隻水牛，只有佢既糧食。賞罷西貢海，油降打瀉柔坳，跟麥徑旅人說聲早。

＊下降黃竹山古道，大概係境內未開發既古道之中最宏偉，最巧奪人工，保持得最完整既一條。踏著路上平整既石板，厚厚既苔蘚，環顧四周既參天古木，荒宅頹垣，一邊感受廢村裡頭陰深古樸既氛圍，一邊想像當年今日既隱世繁華。

＊古道，不見熱腸，只有處處圍牆。漫步真．古道，這裡，一磚一瓦，一草一木，盡善盡美。

＊自幽谷深處傳來既流水聲，引領修行者走進黃竹山廢村既心臟地帶。『係咪大休喇？係呀…』澗中那道石砌圍堰，絕對係完美既大休水源地，設有天然造景，園林雅座，雲石餐桌，沐足瑤池等設施，更有飛鳥，游魚，蚊蠅，蟻群等點綴點綴，如斯優山美地，大休至失溫結冰也願意…

＊休後接上村東古道，穿越枯藤老樹昏鴉，小橋流水人家，沿林間田基橫走五聯達。未幾，墮入結界，四人被傳送至前往石壟仔既古道上。

＊石壟仔祠堂後，有不下三數條登上石林既小路，說穿了，其實前人都只係大方向亂咁剷而已…揀左一條剪口同絲帶最為新淨既路，避開右方既大片藤蔓，沿疏林上走，奔向光線，然後破繭，探頭而出便是石林中段。石壟仔石林，香港第一石林，七億平方厘米既面積果然大得有點浮誇…

＊一顆囂chang的黃豆…

＊看似密鋪石林表面既大奇岩小怪石，其實內藏淺隙深淵，孕育出一片黑暗濕濟既奇異生境，其中既不知名生物，能將前往地心探險既旅人瞬間溶化成其食物…趣味地理一：斷崖崩塌製造了海量的亂石，將崖下的小坑谷填平，形成石壟仔石林，而石林的基底則被淹沒在地表三十米以下，換句話說，岩間的深淵最大深度為三十米。

＊看似friction二百既岩石，其實擁有friction伍佰，石面更被風化成知椅意儀驗～尖尖尖～一不小心趴街七十號既話極有可能被切割成碎片…趣味地理二：石林中的粗粒凝灰岩夾雜了大量火山角礫，抗蝕力極不平均，經風化後留下了如石灰岩山稜般的尖削表面。

＊穿越小樹帶進入石林上段，廣闊依舊，而坡度漸增，令黃豆看起來更浮誇。

＊隘道石紛陳，疊石仿接雲，哼著石頭記，當個攝石人…

＊登上石林最高點，輕鬆接回鹿巢大路。下降鹿巢坳中，回望那片石林奇地。

＊跨越鹿巢坳谷地，沿脊直放百子千孫樹。此時，背後石芽山既亮麗輪廓，都不及腳下大水坑既茶餐廳來得吸引。最後，拿著餐牌，喚來小二，再坐一會，願望便實現了…