• 陰白馬
• 2010年05月18日
• 艱險指數
• 念慈指數
• 庵友：曉，勤，馬騮，白志
• 修行路線
• 

＊前言：呢次活動十分罕見，因為出現左兩位百年難得一見的稀客，可能係佢地呢世人唯一一次出席的庵活動。

＊陰白馬，意思係陰山上有白志馬騮二人。或者，可理解成陷害白馬二人，白馬二人中伏等等；不過，呢個係一次自願中伏事件…

＊話說同窗馬騮要為迎生營搞個南丫島行山活動，事前打算視察環境。當聽到『南丫島』、『行山』同埋『大隊新生』三個關鍵詞的時候，唔知大家諗既同我一唔一樣，即索罟灣行去榕樹灣啦，或者調返轉…不過！當聽到係『登陰山』的時候，實在係感動流淚…佢打破左多年黎填鴨教育的框架…竟然唔係跟大路，而係想一探人跡稀少的陰山，淨係個一份心！已經贏左！在這一刻他不是一­個人在戰鬥，他不是­一個人！偉大的意大利的左後衛！萬歲！冷靜返先…另一罕見既係馬騮唔知點樣引到白志出黎為人們帶來無限歡樂。

＊朝早黎到碼頭，白志先至知道係南丫島，要搭船，『Holy Shit Ship!』...=_=上船無耐，幾納米的浪花已足以引起十級暈船浪，面無血色，一滴冷汗由鬢部慢慢流落下巴，浪下浪下…=_=由於兒童不宜，所以加上馬賽克。聞說落船就會無事，睇見呢個情形，三人除左恭喜之外，乜都做唔到。果然，落船之後，變回一條活龍。

＊話說係呢次視察之前，馬騮已經重複重複又重複咁視察過幾次，不過每次見到陰山都卻步，所以搵返經驗人士同行。而佢地每次的行程都有唔同難度，務求為新生們訂造一個合適舒適的行程，盡責到呢一個程度，實在係能人所不能，須知道每程的船費都十分和味架嘛。

＊雖然黎過幾次，都要睇清楚d既…話說今次係首次登陰山，所以都要睇下地圖先既，說好的經驗人士呢...=_=

＊雪一聲，已經黎到陰菱坳，認住個亭仔就係啦。左菱角右陰山，條石梯靚到。

＊其實，由踏上第一級石梯開始，那人已經如平常開始出現高山反應。上到第二級，已經想回家，很好。上多十厘米，係亭中歇歇，『好輕鬆ja嘛，你好累咩？』，出自那崩潰的人...=_=

＊亭後就係每次卻步的地方，燈光熄滅了，音樂靜止了，今次真的要攻頂了。

＊『好輕鬆ja嘛，不過，你累我地可以返轉頭架』...=_=說著說著，到陰山地標了。以為到頂，過多個坳先係呀。

＊繼續『好輕鬆ja嘛』...

＊陰山果然係比較少人行，登山的路感覺上都比較密。而當見到左圖堆石，就真的到頂了。『陰山高海拔三百五十三米，又名山地塘，南丫島最高點，係少數未被開發既南丫山頭之一，山頂景觀不俗，除左可以俯瞰全島，仲可以望到遠處既港島同大嶼山。』笑一笑，陰山上有白志馬騮二人。

＊放低二人在山頂，另二人繼續南下，希望見見傳說中的踏板石。不過搵左一大輪都搵唔到，浮誇位就搵到個，同圓角黎張合照先。再繼續向下搵左一輪，都係見唔到，係功課做唔足的情況下，都係欣賞下其他石景算…事後得知踏板石個位都幾低下，下次再去啦。

＊回合山頂二人。『上山容易，落山難』，加上條落山路密到錨啤，真係苦了兩位稀客啦。落山落到崩潰，依然保持住真我的風采，『好輕鬆ja嘛』...=_=

＊黎返開揚位，但間唔中有些少疑似分岔路，兩位經驗人士係前面探探路；兩位稀客就係後面繼續漫漫長路…

＊落到咁上下，蘆鬚城沙灘在望啦。仲要穿越一段斜坡密林，同埋一段茂密草叢，崩潰崩潰。而草叢尾聲唔知有d咩草，掂到之後，會有痕癢紅腫的情況出現，四人都中左招，只有輕重之分...

＊拿拿臨去沙灘沖洗下先無事，整理完畢，慢步回到起點碼頭，等候回家的船。

＊在船上見証埋奇蹟的時刻，真的很美…回到中環，今日行程如何呀？『好輕鬆ja嘛』...

＊後話：經過今次視察，迎生營登陰山活動取消。