• 夏陰菱
• 2006年07月05日
• 艱險指數
• 念慈指數
• 庵友：流邦
• 修行路線
• 

＊夏陰菱，意思係夏日暢遊陰山菱角山。

＊索罟灣搶灘登陸，天后宮後面上陰菱坳，左菱角右陰山，晨早流流當然要揀個矮少少既熱下身先。轉左上菱角山，大路邊有一堆防空洞，而家入去只會搞到成身泥。

＊紡錘奇石。

＊好快已經登頂，山頂景觀唔錯，石排灣，圓角，大角等盡入眼簾。

＊山頂一段路邊有好多巨型突石，其中有唔少更加係疊石，斜斜地呢舊有名架，有興趣知既話可以參考下阿享哥哥d名著…

＊落山之後過石排灣，好靚既一個海灣，灣型好似湖一樣，中間仲真係有唔少石排，幾特別。灣後面既波板有水落，前人搭建左唔少沖身設施，十分方便。

＊時候尚早不如綑下邊，向圓角方向小綑一段，灣口既石咀附近會搵到鬼手岩。

＊行前兩步就係著名既鬼面岩，八分神似，卻十分神奇，成塊壁好似蝕到溶左咁。睇真少少，原來佢個頭都幾梯下…=_=

＊綑夠收手，入東澳經騎樓石上返陰菱坳，轉左征戰陰山。可能夏天少人玩，條路都幾密下，大熱天時咁剷法真係幾難頂，唯有不斷用奪寶奇兵做比較黎安慰下自己…上到咁上下就會見到陰山奇岩之首，不文石。

＊陰山高海拔三百五十三米，又名山地塘，南丫島最高點，係少數未被開發既南丫山頭之一，山頂景觀不俗，除左可以俯瞰全島，仲可以望到遠處既港島同大嶼山。北脊落山，去到尾段比路胚引左去索罟灣方向，又斜又密，睇黎上一手只係亂咁爆，最後仲要穿過人地屋企先出得返大路…過蘆鬚城大休，吹下海風十分寫意。大休後沿家樂徑北上。

＊呢段又係全程暴曬，好彩上山之前買左樽冰極百花蛇舌草，一流。

＊經洪聖爺出榕樹灣，見有時間順手兜一轉北角，返榕樹灣t模式，搭船出中環完成。