• 深篤
• 2008年05月17日
• 艱險指數
• 念慈指數
• 庵友：住持，燕
• 修行路線
• 

＊深篤，除左可以用黎形容各位庵友之間的交情，佢亦都係一個地方名黎，代表住一個死寂既海灣，一個神秘既禁區，一個黑暗既墓地，一個遺失既國度…

＊08年第一次出艇，冷雷唔記得左入黎，做得好…=_=經佢專人電話指導之後，我地終於發現新大陸。收拾行裝，順道四周參觀一下，整體黎講基地環境十分wild，卻非常企理，蟑螂和蜘蛛們放置得尚算整齊。

＊十一點幾落艇啟航，橫渡斬竹灣，路過曝罟灣，駛向南風灣。

＊過左南風灣同西壩之後既一個v形海灣，就係傳說中既深篤。由於而家成個深篤已經成為左『被拘留船隻碇泊區』（LegCo,1992），所以灣口設置左一道浮動屏障（想當年泳渡深篤都係全靠佢）將整個海灣對外封鎖。作為住持既然一場黎到又點可以唔伺機潛入呢…貼住屏障一路撐，去到接近南岸既一邊，利用屏障預設既小缺口成功突入深篤內灣。

＊一入到去即刻按照計劃分頭行事，阿燕負責引開敵軍，而我就不斷尋找掩蔽體深入禁區…

＊上次泳渡既時候玩左灣口既一兩架爛船，潛入深篤既經驗值因而提升，今次配備埋獨木舟，可謂信心大增，除左大大增加左靈活性，仲將萬一事發時既逃走成功率提高至百分之九十。一入去首先見到南岸既幾架爛船，雖然佢地仲保持到直立既姿態，但都唔敢撐太埋，畢竟佢地仍然有三根釘，桔穿架艇返唔到去就唔好啦。

＊方舟…

＊所謂船隻碇泊區，基本上係一個比船隻自然腐化成屍體既地方，當然，入面間唔中都會有新住客，老住客亦會隨時比人拖出公海棄屍。

＊側船，打乒乓波經常會用到佢…

＊沿住海灣既邊緣逆時針遊走，參觀晒所有船隻之後就以冷雷不及掩耳既速度逃走，會合屏障外面既阿燕，原來佢入黎唔夠兩分鐘就比人趕左出去喇陰功，可見我地既分工合作十分良好。玩完深篤都只係十二點幾，繼續閒遊西貢入海，沿企人石海岸南行，路過企人石。

＊淡水灣。大蛇灣。

＊蠄蟧灣，我地今日既大休之地，大蛇灣同蛇灣角之間既一個小沙灘，水清沙幼。當前既寧靜只係一個假像，每逢夏天週末黎呢度遊船河既人可謂絡繹不絕，數量足以同冷雷既冷言冷語匹敵，尤其係大風大浪d船出唔到外海既時候。好彩而家仲係初夏，遊人只有小貓三四隻，游下水，曬下太陽，好不寫意。

＊回航，劫走了浮床，帶左佢返屋企。雞洲魚排。

＊穿過滘西大頭二洲之間既水道，再亂過馬路就可以輕輕鬆鬆返到基地，十分美好既一日。見到冷雷，太耐無見，當然要馬上碌落艇同佢寒暄一番。