• 獨木鐘
• 2007年09月09日
• 艱險指數
• 念慈指數
• 庵友：chyee，心
• 修行路線
• 

＊吊鐘洞，東海四大名拱之一（其餘三個皆在甕缸群島），位於吊鐘洲南岸，為該島之天然地標。拱門所在的巨岩，地圖標示為金鐘岩，俗稱金魚擺尾，從西北方的山咀俯瞰最為神似。欲到訪吊鐘洞，獨木舟是你的最佳搭擋。

＊十點半擺脫冷雷出發，十分慣性地亂過馬路衝向對岸鹽田仔，路過石洲燈塔之後隨即轉入橋咀滘西之間既平靜水道。

＊一路向南，繞過白沙咀後繼續緊貼滘西西南岸前進，呢段海岸亦係全滘西洲最明顯既海蝕地貌，沿途出現唔少中小型海蝕洞，係時候尋找一下著陸點。

＊登陸滘西洞內洞（有關資料請參閱劉李林前輩既禁書），洞口頗大，更設有微型水簾一道，唔錯。順帶一提，今日個海十分user-friendly，無風無浪，而且水色不俗。

＊洞內洞旁邊既人間瑤池，非常別緻。行前少少就會見到神仙井南坑澗口既流瀑，著名船河景點之一。

＊洞內洞一景。

＊上艇離開，橫越滘西水道以西既海灣，南下吊鐘洲，穿越西南角既吊鐘排水道，進入另一片天地，吊鐘南岸。

＊一眼望去，盡是壯觀既海蝕地貌，除左一幅幅巨大既凝灰岩牆，當然唔少得今日既主角，吊鐘洞。另外，吊鐘洞左邊既潮音洞亦甚具名氣，外形雄偉嚇人，洞內寬廣而漆黑，加上震耳欲聾既潮音，實在令人卻步…

＊駛向金鐘岩，穿越吊鐘拱門，氣勢非凡。十二時三刻登陸洞內既亂石灘，少不免要使用暴力將架艇強行拖上岸，完全無視架艇徹底崩潰既可能性…

＊吊鐘洞大休，麵包再次充滿鹽份，很好…=_=爬上洞後既石牆欣賞一下四周既壯麗美景，除左面前既巨大天然拱門，西北方既百米絕壁亦相當懾人。

＊吊鐘洞…

＊大休後再次穿越拱門離開，沿吊鐘南岸東移，海蝕地貌依然壯觀，天塹，岩塔，礁排，水道，盡善盡美。

＊別去美好既吊鐘南岸，繞過企山咀，穿越匙洲門回到內海，路過滘西水道東端，沿滘西東岸北上。

＊路過夾螺角後進入撻皮模式，幸好有無限既送尾浪，為我地增加大量西北偏北既向量，非常好。望見家鄉，閒遊到達尾聲，最後於十五時許回到古浪聚，完成獨木鐘之旅。