• 華山
• 2008年04月25日
• 艱險指數
• 經典指數
• 庵友：流瑤龔曉德
• 修行路線
• 

＊華山，單車四嶽之西北嶽，山脈位於北區平原之上，呈東西走向，長約五公里，由多個高海拔百餘米的小山頭組成，最高峰為中段的犀牛望月。在華山山脈的山脊之上，築有舊軍路一條，蜿蜒起伏，甚具氣勢，素有華山長城之稱。

＊十點正油塘老地方集合，當然又係無限delay…九龍塘轉車期間，眾庵友繼續做埋晒d底線行為，成功引黎大批途人圍觀…

＊十一時三刻太和開車，沿大埔公路直奔林村交匯處，穿越大窩谷地北上粉嶺，途中會經過一條令人崩潰既波浪橋。

＊重返鬧市，沿馬會道直入上水，但有個叫張曉既人無啦啦轉左入沙頭角公路仍懵然不知，係咁唯有追佢返黎…重返正途到達上水，再次上演一幕鬧市迷路，最後搞到要搬架車上行人天橋脫困，好harsh既做法…

＊穿過一條秘密交易隧道之後就正式離開上水鬧市，一路向北，直趨祖國文明。

＊…=_=

＊沿石上河畔前進，左邊就係傳說中既塱原濕地。兩河交界左轉雙魚河畔一訪河上鄉。

＊鄧肯…=_=

＊河上鄉鴻淘豆品廠大休，一到步即刻落大雨。

＊八蚊任食豆腐花環節，既然加左價就當然要食到佢窮。最後以五人十九碗完成，差一碗就可以達到兩蚊一碗既佳績，張曉既錯…

＊等左十年終於停雨，十四時三刻重新開車，趨向華山山脈。

＊重返石上河畔繼續北上，進入羅湖既範圍，再無視一切向北發展既話應該會全庵覆沒於公安既槍炮之下…排頭路之前右轉渡河，走勢轉為向東。

＊過左河之後會去到一個呈工地狀既奇怪地方，上面有n條巨型東江輸水管，同埋一大堆奇怪裝置。庵友們當然唔會放過呢個大好機會，穿越於水管裝置之中，不斷影相搞事，最終惹黎工地伯伯既不滿…

＊沿秘道穿過火車路軌去到另一邊，路邊設有水管斜台乙個，繼續搞事啦仲等…呢個時候，工地伯伯竟然來勢洶洶咁追過黎harsh我地，見到咁唯有即刻上車逃走…

＊沿虎地坳道逃走，k幾咁長既雙線行車靚路竟然一架車都無，大路飛車模式真係開心。好快就出到文錦渡路，對面馬路就係華山既入口。

＊踏上華山之途。

＊本來除左條路斜d之外都無乜大問題，但上到咁上下，條路開始斜到不能接受，加上天陰雨濕令路面friction大減，行唔夠兩步就連人帶車slide返落黎，好崩潰咁被困斜路底…=_=幸好有庵友成功研發新技術，就係將單車用brake鎖死，化身成極良好既攀升器，然後著下著下慢慢典上山，絕對體力化既做法，崩潰指數去到歷史高位…

＊上到山脊終於出現坦途，一連串小上小落，沿住蜿蜒既山脊追追趕趕高高低低，感覺十分良好。

＊天真地以為落斜會有好日子過，點知某庵友一試之下發現條路根本斜到落唔到，一上車即刻連人帶車不受控制咁slide落街，全庵再次陷入彌留狀態…解決方法：抬起架車，拉後重心，沿路邊石壆慢慢典落山…

＊林瑤飛車圖…

＊華山山頂既求雨碑。

＊過左華山之後依然係無窮無盡既上上落落，望唔到盡頭既無限個小山頭。十六時零六分，五名庵友成功征服華山山脈之巔犀牛望月，好感動囉唔該。

＊再過多兩三個小山頭，黎到最後一段，一氣呵成既落山路段，眾庵友完全無視所有急彎，哪怕佢一個唔小心偏離賽道飛墮落山…體驗完十光年上山，十分鐘落山既過程之後，經沙頭角公路出粉嶺，沿路驅車返太和完成華山之旅。