• 車太玄
• 2007年08月09日
• 艱險指數
• 經典指數
• 庵友：流瑤翀曉蓮
• 修行路線
• 

＊單車，實在太玄妙了…

＊三號風球既早上，五名庵友冒死前往火炭，十點鐘到達單車舖，一如眾庵友所料，咁既天絕對唔會有人肯開門做生意…呢個時候當然要出絕招發佢一野爛喳，打比老闆哀求，要脅，怒吼幾句，佢唯有選擇屈服…就係咁足足等左一百分鐘，終於取得爛車五輛，無錯，係爛車…=_=

＊沿單車徑出河邊，插蓮不斷表演飄移，開心得滯竟然大街大巷嚴重炒車，儘管佢半秒之後即刻彈返起身故作瀟灑，佢既尊嚴已經破產…穿過大圍鬧市上斜進入下城門道，好快就推到上黎下城水主壩。

＊壩尾左轉，向城隧方向踩，全程除左一兩段較為斜少少之外，其餘既都只係小上小落，加上路靚，無車等等既利好因素，非常鼓勵大家肆意橫衝直撞，只要小心仁興附近既三數個急彎就可以。

＊城隧。城水主壩。

＊城隧旁邊仲有一條飛瀑狀物體，喜歡玩命既朋友可以試攀一下。睇完風景沿路折返，全程飛車耶耶耶，感覺良好。趁有時間，小組點遊一下香粉寮坑澗口既百尺飛流，氣勢不俗，黑雨觀瀑既頹廢選擇。

＊十四時一刻碌返落大圍，唔t住，按照原定計劃入到大尾督先t模式。

＊沿河畔直踩，等左咁耐終於落雨，仲要係黃豆咁大既暴雨。瑟縮入橋底是鬼爛旦包裹一下銀包電話就繼續行程，林宇中飛車真係一門好崩潰既玩意…

＊鏡頭一轉已經別去了林宇中，黎到大尾篤忠誠t模式，並以高質量完成，念慈庵熟客們誠意推介。

＊完成t模式之後已經十七點幾，但眾庵友仍然無意恐遲遲歸，堅持要上大壩踩返轉。

＊直奔壩尾，小組滲入白沙頭後就此歸去。大壩一段開啟撻皮模式，欣賞下四周既風景，由馬頭峰至馬鞍頭，盡善盡美。

＊十九時正離開大埔，眼見就黎可以順利回到起點之際，玄妙既事情終於發生…

＊話說眾庵友返到城門河畔既時候，發現尾隨既林瑤消失左，於是我吩咐翀曉蓮三人先行返火炭還車，而我就返轉頭搜索一下林瑤既影蹤。就係咁，我地搏輸左…=_=由於林瑤部電話交左比羽中托管，而我部電話又剛好缺乏電流，換言之我地三個單位已經完全失去聯絡…搵左成個鐘都唔見林瑤，決定返單車舖會合三人再作打算，點知…

＊返到單車舖，從老闆口中得知我竟然以首名衝線，崩潰…=_=擺低架車繼續遊蕩，如是者幾個字之後，我與翀曉蓮三人相遇，而三條友比我既答覆係：唔識路…第二次崩潰…=_=搵左咁耐仲未見林瑤，開始有點兒心灰意冷，唯有一齊返單車舖再從長計議。四名庵友返到單車舖，見到門口有個孤獨老人等緊我地，正當我地全部以為佢係老闆之際，睇清楚d，佢唔係老闆，係林瑤！第三次崩潰…=_=

＊原來林瑤架爛車一早已經徹底崩潰，崩潰到推都推唔到，要抬…就係咁，佢一個人抬住架車由馬料水典返黎，足足5k架陰功…更離奇既係，佢抬車既路線竟然可以完全避開晒我地，好彩到咁既地步我都係第一次見…

＊大團圓結局既時間係廿一點幾，老闆已經返左屋企訓覺，只係留低左一個單車鎖比林瑤，叫我地自己搵個位幫佢鎖好晒就可以。呢個時候，林瑤決定用個鎖為今日畫上完美既句號，真係一個句號黎，入面乜都無架，只有空氣…無錯，佢竟然用個鎖鎖住左空氣…還有更刺激的嗎…=_=最後，現場只係留低左一個句號，以及數輛可供任意自取既單車…

＊辛苦係有補償架，最後的最後，我地誤打誤撞搵到一間無敵既酒樓，價錢，質，量三方面皆達致完美，更有舉世無雙既超級孖寶，為經典既一日畫上真正既完美句號。