• 奪寶奇兵
• 2006年06月23-24日
• 艱險指數
• 經典指數
• 庵友：Chyee, Fa, Syl
• 修行路線
• 

＊寶鏡頂的日出，可能是最美麗的日出…

＊朝早見天朗氣清，一時興起想行下夜山，好隨意咁上網叫下人，出奇地竟然得到正面回應，三人成團，非常好。順風車直入大清，目標直指田下山，凌晨零時成功登頂，坐低欣賞一下將軍澳同維港東部既亮麗夜景。

＊大路向東南面落山，之後懶醒試下唔睇地圖亂咁行，結果搞到迷失荒野…睇黎今晚都係返唔到出去，真係唔開心…=_=唯有繼續向前亂咁行，經過好多奇怪既地方，有石灘，有大草地，仲有飲水機…最後去到一塊大平地，上面放左好多奇怪既大型機器，究竟呢個係咩地方黎？無人知道，但個人認為好可能係秘密軍事基地…

＊大平地四周漆黑一片，愈行愈驚。行行下突然唔知做乜有機器發出警報聲，唔夠兩秒即刻全場著晒燈…雖然我地無做虧心事，但聽到咁誇張既警報當然要逃走，如果唔係比d系統裝置一野擊斃都唔知咩事…=_=諗都唔諗轉身走，但前面既竟然係一大座山，無計啦，照剷…極斜，極密，而且零路胚，但為左唔想死，一路仍然保持到每秒三米既速度向上爆發。

＊剷到咁上下，總算遠離左秘密基地。呢個時候望返落去見到有部隊衝入去搜索，仲有人用電筒向我地個方向照過黎，好驚佢一見到我地就會開火攻擊，唯有即刻趴低聽天由命。呢幾分鐘真係極漫長，好彩最後都無比人照到，好險…等班部隊走晒之後先敢郁，繼續向山頂方向剷。

＊上到山頂，終於可以放心停低休息下。雖然唔知呢度係邊度，但風景真係一流，而且今日既能見度趨向無限，靚到絕。

＊日出前的一刻，才是最美麗的一刻…

＊個天愈黎愈光，我地對自己既位置開始有少少頭緒。

＊一縷紅雲。

＊傷心太平洋既海平面日出，令人迷醉…

＊所有野比起眼前無邊無際既海洋都變得好渺小，蚺蛇尖，甕缸，果洲，蒲台，以至擔杆，七娘山，似乎已經觸手可及。如果要將所有見到既野由近至遠分成十層，今日既七娘山最多只係第二層。

＊花。早晨的東龍島與佛堂角。

＊向西面回首一望，謎底終於解開，傳說中既．寶！鏡！頂！竟然比我地誤打誤撞咁征服左…呢一刻真係百感交集，一種難以形容既感動湧上心頭，再回想返尋晚既一切經歷，只能夠一笑置之…

＊感動還感動，我地而家須要做既係重返文明…沿尋晚既1%路胚剷返落山，剷剷下居然偏離左方向，不斷被困於荊棘，藤蔓，碎泥，以及蟻群之中，情況非常惡劣，幸好得到兩位同伴既幫助，最後總算搵得返原來既路胚落山脫險。落到山望返轉頭，發現成個山坡除左我地剷出黎呢條線之外，其他位基本上充滿陷阱，係無可能上到架…結論係我地尋晚得到上天既指引…=_=

＊再見，寶鏡頂！雖然順利出到尋晚既『秘密基地』，但已經無辦法搵得返尋晚入黎條路，於是沿馬路慢慢行返出去。

＊最後，好唔小心咁穿過人地個大門口出返黎，全身而退，完成『奪寶奇兵』既創舉。